muli, 

tayo ay nagkasabay sa jeepney

iba na naman ang suot mo

pero maganda tulad ng dati

samantalang ako’y kupas na maong na naman

muli,

napatitig ako sayo

at napanganga sa malambing mong “bayad ho”

at nang makita ang makinis mong braso

muli,

hindi ka sa akin nakatingin

ang buhok mong nililipad ng hangin

habang nakadungaw at may ngiting mahinhin

muli, 

masaya akong nagmamasid sa’yo

habang umiikot ang isip mo tulad ng gulong ng jeep na ‘to

at binubulong ko ang di marinig na pagsuyo

muli,

ang byahe’y pumunta sa hangganan

dito sa kanto, kung saan ang aking babaan

ang aking pagsakay ay lakbay naman

muli,

ako’y hihiling na sundan ng tingin

ng mga mata mong hindi  pa ako napapansin

at mamaya ako ay muling mananalangin

na sana’y muli,

makasabay ka sa jeepney uli

na mapansin na ang aking nakangiting labi

habang tayo’y magkasama sa pag-uwi